متحدہ عرب امارات میں سیلابی صورتحال،شہری گھروں میں محصور

متحدہ عرب امارات میں شدید بارشوں سے سیلابی صورتحال پیدا ہوگئی۔ ابو ظبی، فجیرا اور العین میں موسلادھار بارشوں کے بعد اہم شاہراہوں پر پانی جمع ہوگیا، خراب موسم کے باعث ابوظبی میں تمام پارکس کو بند کردیا گیا۔محکمہ موسمیات نے متحدہ عرب امارات میں آج بھی شدید بارشوں کی پیشگوئی کردی۔عمان میں بھی طوفانی ہواں اور موسلادھار بارش نے شہریوں کو گھروں میں محصور کردیا اورسڑکوں پر ٹریفک کا نظام بھی متاثر رہا۔متحدہ عرب امارات میں رات بھر گرج چمک کیساتھ موسلا دھار بارش ہوئی۔محکمہ موسمیات نے ابوظبی، دبئی، شارجہ، راس الخیمہ اور عجمان میں علیحدہ علیحدہ شدت کے ساتھ بارش ریکارڈ کی۔دبئی میں گرج چمک کیساتھ تیز بارش ہوئی اور آسمانی بجلی گرنے کے واقعات بھی رپورٹ ہوئے۔حکام کی جانب سے لوگوں کو گھروں کے اندر رہنے کی تاکید کے بعد بھی کچھ رہائشیوں کو خراب موسم کے دوران چھتریاں تھامے باہر نکلتے ہوئے دیکھا گیا۔